Est totu prontu po sa prima partida de sa Natzionali Sarda. Oi, su 19 de martu a is ses e mesu, in su campu Frogheri de Nugoro, sa scuadra de Bernardu Mereu si dda giogat contras de una fata de giogadoris strangius chi giogant in Sardigna. A innanti de giogai po unu minutu s’ant a citiri totus po arregodai Tanielli Atzeni, su piciocu de Cuartu mortu cenarba passada in su Sardegna Arena candu si fut castiendu Casteddu-Fiorentina.
“Seus partius de sa disponibilidadi de prus de cincuanta giogadoris – fait sciri su diretori generali Vitoriu Sanna – ma calencunu oi non c’est poita s’est strupiau o sa scuadra sua non dd’at lassau moviri ca non si podit erriscai de si strupiai etotu. Est, a dogna manera, importanti meda sa volontadi de is giogadoris de bolli giogai custa partida, chi a manera sua est storica”. Sa partida s’at a podiri biri in Videolina de is ses e mesu.
Foto: fins-sardigna.net
