Su sindigu de Istintinu Antoni Diana est de acordiu po non fairi pipai nemus in is spiagias de sa bidda sua e est prontu a deliberai po s’istadi chi benit. Duncas, non prus in sa Pelosa aunia giai de s’annu passau non si podit pipai ma finas in totu is atras spiagias. “S’annu passau eus incumentzau in sa Pelosa, – at narau su sindigu – est serbiu e totus funt allirgus e cuntentus. In totu sa spiagia eus postu tres zonas aunia si podit pipai e a s’acabu de s’istadi nd’eus arregortu prus de centucorantamila orrestus de sigaretas. De custas, c’at de nai, ca s’otanta po centu ci iant essiri acabadas in s’arena”. Sa pensada de non fairi prus fumai in is spiagias pragit meda finas a su sindigu de S’Alighera Mariu Bruno. “Deu soi  de acordiu – narat -. In is annus passaus eus sempiri postu multas a-i cussus chi betanta is orrestus de is sigaretas in s’arena. Depeus essiri civilis poità s’ambienti si sarvat finas aici. Pensu chi tochit a erribai a non fairi fumai e ddue depeus erribai coidendu, soi cunvintu chi finas chini fumat ddu cumprendat”. Cun is sindigus de Strintinu e S’Alighera est de acordiu finas su sindigu de Orosei: “Est una cosa beni fata ma dificili meda de podiri apricai, teneus spiagias longas meda e a controllai at essi dificili meda”.

 

 

Foto: Meteoweb.it