Is studentis casteddaius funt calaus in prassa, custu mengianu, po fairi intendiri a is pastoris sa solidariedadi insoru. Funt prus de milli de totu is scolas de Casteddu e de is bidda in is orus chi si funt agataus in denanti de su Consigliu Regionali e, a is degi, si funt postus a betai passus in totu is orrugas de su centru. De viaRoma a via XX Settembre e duncas via Sonnino, funt erribaus in prassa Garibaldi e de in cui funt bessius in via Garibaldi e in via Manno po erribai in prassa Yenne. “Seus innoi poita est in giogu su benidori de totu is sardus – ant aboginau – oi tocat a is pastoris ma cras podit tocai a nosu puru”. Is piciocus funt insegus erribaus in viale Trento aunia a pustis prangiu ant erribai is pastoris de totu sa Sardigna po s’atobiu cun is politicus regionalis. Is studentis sardus ant aboginau fueddus contras sa classi politiga e contras is industrialis.
Foto: youtg.net
