Christian Solinas est su presidenti nou de sa Sardigna. Su candidau de sa coalitzioni de su centrudresta pigat su 47,79 po centu de is votus e si lassat a palas a Massimu Zedda de catodigi puntus. Su sindigu de Casteddu si frimat a su 32,94 po centu. Is Steddaus ndi funt calaus e cun Franciscu Desogus erribant a su 11,18 po centu. Meda prus a palas is atrus cuatru candidaus, chi non erribant a su 5 po centu chi serbiat po tenni sonumancu unu consiglieri.

Paulu Maninchedda, de su Partidu de is sardus si pigat su 3,3 po centu, Mauru Pili cun Sardi Liberi su 2,3 po centu, Andria Murgia de Autodeterminatzione a suta de su dus po centu e Vindice Lecis non erribat mancu a s’unu.

Su centrudresta fait su prenu finas in is listas chi erribant a pigai prus de su 50 po centu. Sa Lega de Salvini si pigat otu consiglieris cun su 11,36 po centu de votus, su Partidu Sardu seti consiglieris cun su 9,8 po centu de votus, sighint Fortza Italia e Fratelli d’Italia cun ses e tres consiglieris. Totu is atras listas chi funt acostau de Solinas ant a pigai degi consiglieris.

 

 

 

Foto: videolina.it