S’est mortu Gordon Banks, su portieri famau de s’Inghilterra chi at bintu sa copa de su Mundu in su 1966. Teniat otantun’annus. Sa nova de sa morti dd’ant donada totu is giorronalis ingresus. Banks iat po setantatres ias at difendiu sa janna de sa Natzionali ingresa e at giogau in is scuadras de su Stoke City e de su Leicester. In su1972, apustis de un’incidenti in machina aunia fut abarrau tzurpu a un’ogu, s’est arretirau comenti de giogadori. Est famau massimamenti po una parada, de unu corpu de conca de Pelè, in is mondialis messicanus de su 1970, chi po medas giorronalistas e espertus est sa parada prus bella de totu is tempus. Candu dd’arrregodaiant cussa parada Banks naraiat sempiri: “In su fratempus chi mi ndi fui pesendu de terra, Pelè s’est acostiau po mi nai ca si creiat ca fut gol. Dd’ia arrespustu ca ddu creia deu puru” Est intrau in s’istoria de su giogu de palloni finas po essiri s’unicu portieri ingresu, po imoi, a nd’airi pesau sa copa de su mundu.
Foto: mondiali.it
