Su ministru de sa saludi de su guvernu Conte, Orrobertu Spranza, est in carriga de nemancu unu mesi. Est ancora tropu acoitu po sciri comenti funtzionat sa sanidadi sarda ma ta pagu tempus nd’at a sciri de prus ca at atobiai s’assessori de sanidadi Mariu Nieddu. Aici, in su cungressu de is dotoris de familia, incumentzau mercuris passau in Crabonaxa, su ministru at scioberau de chistionai feti de sa chistioni natzionali, chi, a dogna manera, interessant sa Sardigna puru. Funt aberu tropus, po nai, is italianus chi non faint nudda po si curai poita no tenint dinari po si pagai is meiginas e is bisitas. In Sardigna, segundu una cica, funt su noi po centu, cuasi setantamila familias! Su ministru po cussu narat: “Dogna borta chi unu citadinu no si curata est una su Stadu chi perdit e nosu depeus fairi de totu po frimai custa cosa”. S’obietivu de su ministru, comenti at nau in s’atobiu, “est cussu de cicai de curai a totus, est unu puntu frimu de sa Costitutzioni chi mai depit essiri postu in discussioni”.
