Testo di Gianni Loy, cantato da Antonello Giuntini
Composta in occasione de sa “Marcia pro su tribagliu” del 6/7 dicembre 1979 organizzata dalla FLM sarda).
Procurade de moderare
Barones sa tirannia.
Non pius nobiles ma borghesia
Cambiada no est s’opressione
Apetigant sa nostra Natzione
prepotentes de totu sa terra
Declaramus da-e nou sa gherra
Finalmente devimus cambiare
Da-e Casteddu a Perdasdefogu
Da-e Aristanis a Maddalena
Sa Sardigna de bombas est piena
De soldados e sotomarinos
E no dant frutu custos terrinos
Missiles in totue sunt creschende
Ca no bastat su chi sunt gosende
Oe cherent galu pius logu.
Ma sas bases chi andent a fogu
Cun tedescos e americanos
Canadesos e italianos
Bennidos pro fagher sa gherra
Ca si che furant sa terra
E nos preparant pro petza ‘e masellu
Ma ischit dare frutu pius bellu
Custa terra cun su tribagliu
Procurade de moderare
Potentes sa tirannia
Ca faeddades de Autonomia
Ma no azis cambiadu idea
Bos piaghet dinari e cadrea
Fizos de sos matessi barones
Piu modernos ma semper ladrones
Oe cherimus de l’acabare.
sa Rinascita l’agat bella
Chie ingrassadu s’est che mannale
Ca falende su capitale
At promissu su chi no at dadu
E pro amentu nos at lassadu
Catedrales in su desertu
Sa maleditzione chi at fertu
In Sardigna che carestia.
Oe falamus da-e Logudoro
Da-e Barbagia da-e Campidanu
E impari nos damus sa manu
Pro chi siat s’unione pius forte
Ca gherramus pro sa nostra sorte
Ca gherramus pro sa nostra vida.
O Sardigna como ischida
Da-e nou nos invadet su Moro.
Pius forte s’istringat s’unione
De massagios e de pastores
De mecanicos e minadores
Totus impari pro su tribagliu
Non creimus mancu pro isbagliu
de sos meres a sa zenia
Su tribagliu e s’Autonomia
Pro chi crescat sa nostra Natzione.
Ma da-e como a manu nostra
La mandamus a fora a fora
Custa classe isfrutadora
Ch’in miseria nos at betadu
E cambiamus custu istadu
De opressione e de prepotentzia
Ca finida est sa passientzia
De sa gente tribagliadora.
