De candu sa Conad at comporau s’Auchan is trabagliadoris non scint indda de su benidori insoru. Funt chena peruna certesa e dispragit a pensai ca erriscant puru su postu de trabagliu. Po totu custu, ma non solu, is sindacaus de sa Cgil, Cisl e Uil ant decidiu chi po su 30 de Santu Aine s’at a scioperai in is cuatru butegas de sa Sardigna puru. Funt arriolaus a livellu natzionali ma finas innoi tocat a donai crobba meda. “In Sardigna is setigentutrintotu trabagliadoris – fait sciri Cristianu Ardau, segretariu de sa Uilitucs – non connoscint finas a imoi su benidori insoru a pustis chi Conad at comporau. Sa Conad e totu no at donau peruna garantzia po totu is prus de digiotumila trabagliadoris e timeus chi ant essi medas cussus chi ant a perdiri su trabagliu in totu s’Italia e duncas in Sardigna puru”. Chini trabagliat at a bigliai, po mori de custu, in Casteddu, in Tatari e in Terranoa. “Seus arriolaus meda – faint sciri is segretarius de regionalis Milazzo, de sa Filcams Cgil, e Giuseppu Atzori de sa Fisascat Cisl – poita scieus ca feti sa butega de Santa Gilla depit passai a sa Conad, de is atras non scieus ancora nudda”.

 

 

 

 

Foto: https://www.bergamonews.it/2019/09/04/auchan-vende-conad-prende-personale-e-punti-vendita-di-bolgare-romano-e-curno/323645/