Imoi s’istadi est acabada de averas po is studentis sardus. Chi calencuna classi est giai trabagliendu de una pariga de dìs oi incumentzant po totus is atrus is scolas. Funt dugentumila pipius e piciocus chi de oi finas a su mesi de làmpadas si depint scaresciri is giogus e depint pensai a studiai. In is urtimus cuatr’annus si funt perdius otumila e tregentus studentis, prus o mancu, po mori de is pagus pipius chi nascint e, invecias, in is urtimus degi funt trintacuatrumila de mancu. Numurus chi faint a timiri. Po chistionai de is professoris e de is maistus est a nai ca funt stetius nominaus in segentusotantaseti de is millicincugentusbintitres de cussus chi funt passaus de ruolu. Franciscu Feliziani, diretori de s’uficiu scolasticu regionali, in is dìs passadas iat nau ca “po prus de milli postus ant essi lamaus suplentis” e ca “de professoris de sustegnu ndi mancant prus de tremila”. Totu custu poita in medas funt andaus in pensioni gratzias a “Quota 100”: in custu mesi de Cabudanni funt, prus o mancu, milli e segentus professoris a airi lassau su trabagliu.
Foto: http://www.officina-benessere.it/giorno-scuola-racconto/
