Setanta cuncursus, prus o mancu, aintru de su 31 de Nadale, po un’inforrada de milli e duxentus trabagliadoris in sa Sanidadi sarda. Sa Giunta Regionali de su presidenti Christian Solinas incumentzat a fairi in su seriu. Is categorias interessadas funt cussas de dotoris, veterinarius e farmacistas. Chini erribat a innanti in su cuncursu at a tenni sa possibilidadi de scioberai prima de totus aunia trabagliai, chini invecias narat ca nou a su trabagliu poita atesu o atra cosa nci benit bogau de sa graduatoria. Totu custu si ligit in sa delibera chi su presidenti Solinas e s’assessori Màriu Nieddu ant amostau a is giorronalistas.
“Custa giunta si ponit a curriri e fait cuncursus chi furint frimus de annus meda”, at nau Solinas. At a pusti aciuntu “ca funt cuncursus chi ant a binciri chini ddu meressit, poita chini bincit podit scioberai a innanti de is atrus”. Po s’assessori Nieddu custa est s’arrespusta a sa genti chi est sempiri nendu ca mancat su personali in sa sanidadi.
