S’ambienti est su tema de unu disegnu nou chi s’est aciuntu in Santu Engiu in cussu chi in is urtimus degi annus parti una bidda-museu. Imoi, is orrugas e is prassas de sa bidda contant prus o mancu centu binti murales. S’atru merì nd’ant festau un’atru de Jorgi Casu, chi est de Santu Engiu e totu ma connotu in totu su mundu po s’atividadi de muralista. Casu bivit in New york ma si movit in totu su mundu candu benit intzerriau. A innanti de intrai s’istadi su sotziu culturali Skizzo dd’at lamau e torrau a portai a domu po ddu fairi trabagliai a un’atru murali, s’artista ndi at giai fatu cincu in bidda sua e-i custu fut su de ses. Po su murali nou ant umperau sa faciada de centucincuanta metrus cuadrus de una domu in Via Parrocchia e Casu s’est postu a ddu fairi impari a atrus trinta piciocus e piciocas de Skizzo. Ant trabagliau a suta de is telonis e in pissu de su pontegiu e a s’acabu nd’est bessiu unu murali mannu e bellu meda: Greenland.
