“Eia, fui in su Partidu Democratigu ma non faia meda cosa, naraus ca fui rentziana, mi soi stesiada de su partidu candu nce dd’ant bogau”. Gabriella Murgia, cincuanta dus annus nascia in Lanusei ma chi bivit in Aristanis, est s’assessori nou de s’Agricoltura de sa giunta de Christian Solinas. S’assessorau ddu boliat sa Lega, est andau invecias a sa Murgia. Non si cumprendit beni chini apat fatu su nomini sû, pariat Fortza Paris cun Sardegna Civica ma Fortza Paris narat ca nou. E issa narat ca dd’at posta comenti de assessori su presidenti Solinas.
Sa Murgia a is eletzionis politicas de su 4 de martzu de s’annu passau votaiat e cicada de fairi votai su Pd e a is rigonalis de su 2014 fut candidada (cincuantaseti is votus pigaus) cun “La Base” chi portaiat votus po su presidenti beciu de sa regioni Franciscu Pigliaru. Non fait finta de esseri un’esperta de Agricoltura ma impromintit de studiai inderetura e ca tocat a eliminai sa burocratzia de totu is modus de fairi.
Foto: youtg.net
