Bellu puntu de su Casteddu in Torinu contras de sa scuadra de Mazzarri. Pariat ponendusì mali sa partida po is piciocus de Maran, a pustis su gol a s’incumentzu de su segundu tempus de Zaza, invecias un’atru corpu de conca de Pavoletti at torrau a ponni sa partida in paridadi. C’at de nai ca su Torinu candu at pigau su gol fut gioghendu in degi poita s’arbitru c’iat bogau de su campu a Zaza po mori ca dd’at segau s’arrespetu. Su Casteddu at acabau sa partida in 9 poita Irrati, s’arbitru, c’at bogau, a pagu tempus de sa fini, a innanti a Pellegrini e in segus a Barella, totu a is dus po airi pigau dus cartellinus grogus.
Una paregiu giustu, po Maran, ca at bidu unu bellu Casteddu contras de una scuadra forti e dificili meda de ddue giogai. Imoi is piciocus de Maran tenint s’ocasioni de ponni su fueddu fini a sa lota po non ci calai in Serie B, difatis erribat sabudu a sa Sardegna Arena su Frosinone chi tenit unu pei giai a su pianu de basciu. Bincendu custa partida su Casteddu iat a bessiri a coranta puntus, chi de sempiri funti s puntus chi serbint po si sarvai.
Foto: ansa.it
