Funt cuatrumila, in Casteddu, is feminas e is ominis chi ant acumpangiau su corteu de su binticincu de arbili chi est partiu de Orruga S’Alighera a is degi de mengianu po erribai biora de mesudì in Prassa Carmine. Genti meda aberu ma mancaiant is istitutzionis regionalis: “Non s’est erribau perunu cumbidu”, ant fatu sciri de sa Presidentzia de sa Giunta regionali.
Totus in s’orruga po s’arregodai de sa fini de sa ditadura fascista e de sa libertadi torrada a godangiai in cussa dì de setantacuatu annus a imoi.
In Tatari, invecias, sa genti s’est agatada in sa prassa de su Comunu, aunia at chistionau su sindigu Nigola Sanna: “A sa Liberatzioni de sa natzioni s’est erribau gratzias a su sacrificiu de picious e piciocas chi, finas chi no dda pensaiant a sa matessi manera, si funt lamaus feti cun d’unu nomini: Partigianus. A-i custus piciocus, a-i custas piciocas su cumunu de Tatari at bofiu intregai una prassa in s’intrada de sa citadi, po fairi sciri ca sa nosta est una citadi oberta, libera, democratiga e antifascista”.
