In Israele Benjamin Netanyahu bincit po sa cuinta borta  de sighiu is eletzionis. A s’acabu de airi contau is votus su partidu de Netanyahu, su Likud, chi cumandat de su 2009, est in pissu de su “Blu Bianco” de s’atru candidau Benny Gantz. Su 26,47 po centu de su Likud e su 26,11 de Blu Bianco.

Po mori de custu, finas chi is dus partidus pargiant cuasi ogualis, su Likud pigat sessantacincu postus de is centubintu de su parlamentu, bastant po si pigai sa magiorantzia de is segius.

Eriseru a merì, sighendu is exit poll, s’unu e s’atru iant giai nau de airi bintu, Netanyahu iat inderetura chistionau de una “Vitoria chi non si podiat mancu pensai”.

Sa genti chi est andada a votai, in totu su Stadu, est cuasi su sesantaseti po centu, cuatru puntus de mancu de is eletzionis de su 2015. Certu ca Netanyahu parit chi no ndi possat calai de su poderi finas chi in is mesis passaus dd’ant incurpau de corrutzioni e de cogliunai.

 

 

 

 

 

 

Foto: 24news.tv