Mancat pagu de prus de una dì po su Presidenti de sa Regioni Solinas po non erribai in Consigliu Regionali cun seti cadiras sbuidas: cussas de is assessoris de sa Giunta chi po imo indi contat feti cincu. Si decidit e si chistionat feti po telefunu poita su Presidenti est foras de Sardigna e po s’ora non si scit de perunu atobiu de is partidus de sa coalitzioni. Mancant , de cussu chi si narat, is urtimus corpus de donai, is assessoraus chi ponint prus arriolu funt cussus de s’Industria e de is Trasportus.

Totus narant, prus o mancu, is proprias cosas: “Seus aspetendu eita narat su presidenti”. Nemus narat de prus, finas poita cussu chi ant deicidiu is partidus est craru de meda e feti Solinas podit decidiri.

Funt duas is chistionis aunia si frimat totu. Su collegiu de Tatari, su prus prenu de genti a pustis cussu de Casteddu, po s’ora, non tenit perunu nomini e ponendu Carrulu Doria a is Trasportus cun Pietrinu Fois a is Trabaglius pubricus si podint acuntentai is sassaresus. S’atra chistioni est cussa de is feminas: po imoi in giunta ddue est feti Alisandra Zedda e podit intrai po s’Agricoltura Daria Inzaina, ma sa lei bolit cuatru feminas in Giunta. Eus a benni a biri.

 

 

 

Foto:ansa.it