Su centrudrestra, cun sa Lega de Salvini chi dda fait de meri, si pigat finas sa Basilicata. A pustis de airi contau is votus su guvernadori nou de sa regioni est Vito Bardi cun su 42,2 po centu. Su presidenti nou at lassau a coa de noi puntus su candidau de su centrumanca Carrulu Trerotola, chi teniat a palas seti listas, chi s’est frimau a su 33,1 po centu. Cun custas eletzionis su centrumanca perdit sa Regioni aunia cumandaiat de su 1995.
A sighiri custus dus, meda a palas, agataus is Steddaus cun Antoni Mattia chi est erribau a su 20,3 po centu, c’at perou de nai ca is Steddaus funt su primu partidu e pigat duas bortas is votus chi iat pigau in su 2013 po is regionalis e totu.
Bardi, chi non at possiu votai poita est residenti in Napoli, at sighiu is numurus de Filiano, bidda de sa familia. In segus est erribau in Potenza e inderetura at fatu sciri: “Ap’a lamai totu is capus de is partidus e eus a fairi una festa manna de su centrudrestra”.
Primu partidu, comenti eus nau, is Steddaus, a sighiri sa Lega e duncas Fortza Italia, a suta de su degi is listas de Trerotola.
Foto: gazzettadelsud.it
