Atra partida perdia de su Casteddu a foras de Sardigna. Custa borta est su Bologna de Mihajlovic a fairi torrai chena puntus is piciocus de Maran. Dus a zeru cun d’unu gol in dogna tempus e partida perdia chena fairi meda po si dda giogai. Maran at scioberau po incumentzai custus giodadoris: Cragno in porta; Srna, Ceppitelli, Pisacane, Pellegrini comenti de difensoris; Padoin, Bradaric, Ionita, Barella a centrucampu e Joao Pedro, Pavoletti a innanti. Su Casteddu abarrat a ses puntus in prus de su Bologna chi est sa tertz’ultima e tinit a is palas finas s’Udinese, chi at perdiu cun sa juventus, sa Spal, chi at fatu su matessi cun s’Inter, e s’Empoli, chi giogat oi cun sa Roma de s’alelnadori beciu de su Casteddu Claudiu Ranieri.
Tocat a si ndi scidai atesu de sa Sardegna Arena, ca non sempiri ndi tocat a torrai cun is mussu scutus de su Continenti. Imoi is orrubius-asulus si dda giogant, in domu, cenarba chi benit cun sa Fiorentina, partida intendia massimamenti po Davide Astori, capitanu de sa Fiorentina mortu s’annu passau chi iat giogau partidas medas cun su Casteddu puru.
Foto: atalantini.online
