Unu Casteddu cun sa malasorti in pissu non ce dda fait a pigai mancu unu puntu in sa partida de eriseru a merì cun s’Atalanta. S’est strupiau  a innanti a incumentzu de partida Birsa, chi s’est segau unu brassu e dd’ant giai inghisciau e apustis Thereau chi at lassau su Casteddu in degi poita Maran iat giai fatu totu is cambius. Una partida nascia mali e acabada peus poita s’Atalanta de Gasperini, chi mercuris passau iat donau una letzioni a sa Juventus boghenduncedda de sa Coppa Italia, non est chi apat fatu chissà eita. A Maran ddi mancaiat giai Barella e a su postu de s’istedda de sa scuadra at giogau Deiola chi est torrau de su Parma sa cida passada. Deiola etotu est cussu chi est andau prus acanta a su paregiu ca nd’at boddiu sa traversa cun-d’unu corpu de conca candu mancaiat pagu a sa fini de sa partida.

A pustis sa partida de eriseru su Casteddu est ancora a cuatru puntus de su Bologna chi perou cun s’allenadori nou est andau a binciri in Milanu cun s’Inter. Propriu in sa citadi de su Duomu at a giogai su Casteddu dominigu dhi benit, sempiri a merì, est un’ocasioni bona po fairi biri ca sa barra e-i sa gana non mancant a is piciocus orrubius e asulus.

 

Foto: repubblica.it