“Figliu nostu, mancari siat piticu, at cumprendiu ca est sucediu calencuna cosa e pregontat poita su babu non est innoi”, narat Priscila Luana Pereira, sa cumpangia de Cesare Battisti arrestau sabudu passau in Bolivia e imoi serrau in su presoni de Massama in Sardigna po pagai sa cundenna a su presoni a vida. “Cesare est malaidu, e cussu chi depit pagai iat essiri tostau po totus, creu chi iat tocai a pediri prus pagu presoni de fairi”, at aciuntu sa sposa de Battisti chi at chistionau cun su giorronali brasilianu O Estado de Sao Paolo.

A pustis is primus bogis chi boliant Battisti in su presoni romanu de Rebibbia, chini de doveri at decidiu de ddu mandai in cussu sardu de Massama “po seguresa massima”. In custu presoni, obertu de su 2012, mai nemus ce dd’at fata a si fuiri. Non est meda mannu, imoi ddue funt 262 presoneris e cuasi totus funt inigui po castiaus beni ma nemus tenit su 41 bis.

Po Battisti s’est obertu unu tempus de abarrai a solu aintru de dì po ses mesis. Candu est erribau dd’ant visitau e schedau e duncas portau in sa setzioni AS2. At cenau cun pasta, petza, birdura e fruta.

 

Foto: ilpost.it