Bessit a sesi su numuru de is piciocus in presoni po airi bociu in cabidanni Manuel Careddu, su piciocheddu de digiot’annus de Macumere. De eriseru est anintru, in Massama, finas Nigola Caboni piciocu ghilartzesu de bintun’annus. Po chini est indaghendu su giovunu no ddue fut candu is atrus ant bociu ma at agiudau custus a interrai Manuel una borta mortu.
Caboni, acumpangiau in su mengianu de eriseru de is carabbineris de Bilartzi a su Cumandu Provinciali de Aristanis, est stetiu intendiu de is investigadoris ghiaus de su colonellu David Egidi chi arrespundit a su procuradori Dominigu Basso.
S’atobiu est durau una bona pariga de oras e a s’acabu de totu sa decisioni pigada est cussa de frimai ccustu piciocu puru. In is intercetatzionis si fut fueddau de un’atru piciocu e is carabbineris ce dd’ant fata a ddi donai unu nomini.
In s’ora est meda probabili chi s’interru de Manuel at essi cenarba chi benit in Macumere, aunia s’at a fairi finas una caminda cun candelas allutas po arregodai su giovunu.
Foto: sardiniapost.it
