“Po benni a innoi e binciri tocat a giogai una bella partida e non isbagliai nudda poita s’Atalanta est una scuadra chi giogat beni, bastat a biri is arresultaus de is urtimus dus annus de is ominis de Gasperini”. Fueddus de allenadori cuntentu meda cussus de Rolando Maran apustis sa vitoria de su Casteddu eriseru in Bergamo.
“Partidas che-i custa – sighit a nai Maran – si bincint ponendu in campu medas cosas comenti ordini, personalidadi, coragiu e calidadi manna in su giogu. Non eus erriscau cuasi nudda e de s’incumentzu a s’acabu de sa partida eus fatu totu beni. Soi cuntentu meda po is piciocus ca ant trabagliau beni totu sa cida passada e soi finas cuntentu po is tifosus casteddaius chi bivint sa scuadra nostra cun su coru”.
Imoi su campionau si frimat po fairi giogai is Natzionalis de Mancini e de Di Biagio. Partint po Coverciano su portieri Cragno (a sa prima lamada de Mancini) e Barella (chi eriseru at segnau su gol chi est bagliu sa vitoria) po sa Natzionali de is mannus e Romagna cun Cerri po sa Natzionali de is piciocus prus giovunus.
Foto: gazzetta.it
