Su Casteddu in-d’una cida at giogua tres partidas, su sabudu innanti de Pasca cun su Torinu, mercuris passau cun su Genoa, eriseru cun su Verona e at perdiu tres bortas, imoi sa classifica fait a timiri. Cincu scuadras, Casteddu, Chievo, Spal, Crotone e Verona, in cincu puntus, custu est cantu ant nau is partidas de eriseru.
Mancaiant giogadoris medas a su Casteddu e in calencuna ocasioni non est stetiu meda fortunau ma sa partida de eriseru cun su Verona de Pecchia depiat essiri giogada cun prus barra e coru. Mancant ancora seti partidas, cun s’Udinese, Bologna, Roma e Atalanta in domu e cun s’Inter, Sampdoria e Fiorentina foras, tocat a ponni a parti totu is problemas e torrai a partiri a forti, chena fairi contus ma gioghendusì dogna partida comenti chi siat una finali.
Parit ca is sardus ndi torrint a scidai is scuadras chi parint mortas, aici est sucediu cun su Torinu, ca erribaiat de cuatru (!) partidas perdias una in fatu de s’atra e aici cun su Verona chi nd’iat perdiu tre totu paris. Imoi sabudu erribat s’Udinese de Oddo chi cun cussa de eriseru cun sa Lazio est erribada a otu partidas perdias de fatu. Ce dd’ant a fairi is piciocus de Lopez a non imbrunconai un’atra borta?
Foto: gazzetta.it
