Est finia mali, meda mali, sa partida de eriseru a noti de su Casteddu contras de su Napoli. Lopez, innanti de dda giogai, iat nau ca non fut una partida sinnada ma fut de giogai po noranta minutus, invecias, coment’est andada a finiri a fatu cumprendiri ca su Napoli est de un’atru mundu.
S’allenadori de is sardus scioberat de giogai cun Han e Pavoletti indenanti e a s’incumentzu de sa partida is dus cicant de sa gherrai meda beni. Is napoletanus faint su primu gol cun Callejon a sa mesora de giogu e a pustis degi minutus faint su segundu puru cun Mertens. Ndi podiant fairi atrus puru is asulus de Sarri ma est stetiu bravu Cragno a parai is tirus de Insigne e Allan.
In su segundu tempus su Napoli ndi fait atrus tres cun Hamsik, Insigne e Mario Rui. 5-0 e totus a domu.
Lopez a s’acabu de sa partida at nau a is giorronalistas ca fut inutili abarrai in difesa po ddus aspetai e ca sa scuadra depiat cicai de giogai e ca, a donnia manera, su Casteddu in su primu tempus ddi est pragiu.
Imoi funt cincu is puntus in prus de sa Spal, chi est cussa chi imoi iat torrai in Serie B, e sa prossima partida at a biri is piciocus de Lopez andai a giogai una partida dificili contras su Genoa de Ballardini, allenadori beciu de su Casteddu in tempu mancu meda atesu.
Foto: Ansa.it
