A pustis s’atobiu de Illorai is partidus e movimentus de su centrudresta po is Regionalis de friargiu crescint de numuru e bessint de seti a undigi. S’aciungint, ma giai si sciat, Sardegna 20Venti, Fortza Paris, Energie per l’Italia e movimento civico Sardegna. Mancat ancora su candidau a presidenti e in Illorai puru su delegau de sa Lega in Sardigna, Eugeniu Zoffili, at nau ca at essi Mateu Salvini a fairi su nomini, candu at erribai in s’Isula giobia e cenarba chi benit. cussu chi parit seguru est ca at a fairi su nomini de Christian Solinas, ma finas is atrus partidus tenint gana de nai sa insoru.
Su centrumanca, invecias, cussu chi decidit su sindigu de Casteddu Massimeddu Zedda, chi fueddendu in dd’unu atobiu cun is giorronalistas at nau, chistionendu de is primarias, “ca a no ddas a bolliri est a non castiai sa storia mia”.
Is Steddaus, a pustis is “dimissionis” de Mariu Puddu comenti de candidau est biendu eita si podit fairi e cun medas probabilidadis ant a cicai de torrai a fairi is primarias donendu is votus cun su computer, is deputaus e is senadoris ant fatu sciri a Di Maio ca iat essi meglius a non tenni unu nomini calau de s’artu.
Foto: youtg.net
