Dominigu su Casteddu tenit una partida importanti meda po su sighiri de su Campionau, bincendu cun su Chievo de Maran at a podiri giogai s’orrestu de is partidas cun prus trancuillidadi. No at essi facili contras de is venetus ca funt arrabiaus e non bincint de una bona pariga de partidas. Is sardus, a pusti de sa bona nova de Faragò ca at a podiri giogai chena farta, eriseru ant perdiu po Filipu Romagna, ca s’est strupiau eriseru a su bursu de su pei. Imoi Lopez no at a podiri fairi giogai né Romagna – chi a donnia manera non iat essi partiu titolari – e nemancu Cigarini, ca in sa partida de dominigu passau cun su Sassuolo si fut strupiau a su pei drestu. Su regista de Lopez at abarrai a foras de su campu po sonumancu unu mesigeddu, e s’allenadori at a depiri donai a calencun’atru is crais de su centrucampu. Barella, castiendu is allenamentus, parit su favoressiu.
A Verona parit chi s’allenatdori de is sardus possat fairi giogai sa scuadra cun su 3-5-2 fendu calai in campu custus giogadoris: Cragno; Andreolli, Ceppitelli, Castan; Padoin, Ionita, Barella, Joao Pedro, Lykogiannis; Sau, Pavoletti.
Foto: europacalcio.it
