De is pilus canudus de is feministas chi gherranta in is annus setanta a is pilus de dogna colori de chini tandu non ci fut e oi manifestat in sa strada cun is cumpangius de scola. Finas Casteddu at tentu, eriseru, sa manifestatzioni po s’otu de martzu, cust’annu promovia de su sotziu “Non una di meno”. Si funt agatadas in medas e ancora de prus in prassa Garibaldi e de inigui ant moviu totu paris. Medas is piciocas e is piciocus de is scolas chi ant donau colori e sperantzia noa a totu su movimentu.
“Teneus abisongiu de cambiai su modu de pensai chi durat de milli e prus annus aunia sa femina est pigada de mira in totu is modus possibilis – at nau Titziana Di Benedetto de su sotziu TamburA battenti – Aunia bivint beni is feminas bivint megliu totus”. De apretziai, po nosu e po totu is sardus de bona volontadi, s’umperu de sa limba in is scritas de sa genti, “Apu nau ca no” ddue fut scritu in-d’unu lenzoru e aici iat tocai a nai e a fairi.
Sa truma de genti de prassa Garibaldi at tocu bia prassa Repubblica e prassa Amendola po ce dd’acabai in prassa de su Carmini aunia at chistionau chini at apariciau s’atobiu.
Foto: nonunadimeno.wordpress.com
