“Abarru segretariu de su Partidu Democratigu finas a su2021”, aici at chistionau custu mengianu Renzi in-d’una intervista chi at fatu a Omnibus, nendu puru ca funt is primarias a ddu decidiri e non is eletzionis. Po custu su presidenti beciu de su Guvernu abarrada in sedda calichisiat cosa at a scucediri dominigu.
Po non perdiri tempus, in s’urtima dȋ chi si podit umperai po fairi campagna eletorali si dd’at pigada cun cussus de sempiri: is Steddaus e-i sa Lega de Salvini.
“Cussu chi iat bolli nai a Salvini est – at nau – ‘sigheus a aboginai?’ Deu apu intzerriau sa Meloni po cudda butigliedda de abba chi nde dda iat boddia in su mentris de una manifestatzioni, a mimi nemus m’at lamau po is sparus contras de una domu de su Pd. Imoi pregontu: ‘Dda boleus acabai de aboginai? Dda boleus acabai de fairi sa campagna eletorali in pissu de is timorias’. Non bogliu chi lunis s’Italia si ndi scidit in manus a genti chi scit feti fairi a timiri e aboginai”.
At tentu cosa de nai finas po Baroni Giuliano, su presidi de sa scola de Brindisi lamau de is Steddaus po fairi su ministru de s’Istrutzioni, sempiri chi bincint is eletzionis de dominigu. “In pissu de sa scola is Steddaus mi nd’anti nau de dogan colori e imoi iant bolli comenti de ministru unu chi sa Bona Scola at agiudau a dda scriri. ‘Comenti si cambiat po non morri’, cantaiat Fiorella Mannoia…”.
Foto: espresso.it
