Tra is guvernadoris de Regioni Franciscu Pigliaru non est tra is prus beni bofius. A ddu nai est unu studiu de Demoskopika, su “Regional Popularity Index” chi at postu atentzioni in migliaias de paginas internet e in is social che youtube, facebook, instagram e google.

Su presidenti sardu erribat in sa parti de mesu de sa classifica, cun 94,9 puntus in-d’una scala chi andat de is 124,6 puntus de Debora Serrachiani (presidenti de su Friuli) a is 91 puntus de Sergiu Chiamparino (Piemonti).

Bosa sa positzioni de Marcellu Pittella (Basilicata) cun 108,3 puntus e su tertzu classificau est su guvernadori de su Venetu, Luca Zaia cun 105,1 puntus.

In pissu de sa media ddue funt finas Giuanni Toti (Liguria), Lucianu D’Alfonso (Abruzzo), Catiuscia Marini (Umbria) e Micheli Emiliano (Puglia): totus brincant is 100 puntus.

Invecias Pàulu Di Laura Frattura (Molise), Pissenti De Luca (Campania), Nigola Zingaretti (Lazio) e su guvernadori de sa Toscana Enrico Rossi abarrant totus a suta de is 100 puntus. Serrant sa parti de mesu de custa classifica is guvernadoris de sa Calabria, Màriu Oliviero, de sa Sicilia Nello Musumeci e, comenti eus nau, de sa Sardigna Franciscu Pigliaru.

A coa de totus erribant Orrobertu Maroni de sa Lombardia, Luca Ceriscioli de is Marche, Stevini Bonaccini de s’Emilia Romagna e Sergiu Chiamparino de su Piemonti.