Giorgio Bubba, giorronalista sportivu e faci connota de 90° minuto, est mortu eriseru a La Spezia. Teniat otantadus annus, fut inviau de sa Rai e at trabagliau finas po “La Domenica sportiva”. Sa scuadra de palloni de su Genoa dd’at arregodau in su giassu cosa sua scriendu: “Fut una de is facis prus connotas de su giorronalismu de sa Liguria. Beni bofiu de totus, faiat parti de cussa scuadra de giorronalistas chi ant fatu scola e chi contanta su giogu de palloni in tempus non sempiri facilis e sinnaus de calencunu iscandulu. De Paulu Valenti a su genoanu Erricu Ameri, de Sandru Ciotti a Luisu Necco, biadu mortu su mesi passau”.
S’Italia de is tifosus aspetaiat Giorgio Bubba po biri is filmaus de is partidas giogadas in Genova e ascurtai cussu chi teniat de nai chini si presentaiat dogna cida in is domus nostras. Comenti unu de familia etotu. Totus aspetaiant custus ominis in is tempus chi ancora is partidas non dd’as trasmitiat nemus e is novas chi si teniant funt cussas de s’arradiu, fata de ominis mannus comenti Alfredu Frovenzali, Ciotti e Ameri. Unu mundu chi non c’est prus ma chini at connotu non si ndi scarescit.
Foto: pianetagenoa1893.net
