S’esercitu de sa Turchia e is alleaus, de cussus chi si funt arrebellaus, sirianus ce dd’ant fata a intrai in Afrin. Sa citadi curda, chi s’agatat in su nord-ovest de sa Siria, a partiri de su binti de gennargiu, est suta assediu de un’atacu de Ankara, in-d’una operatzioni lamada “Ramo d’Ulivo”.

“Is fortzas turcas e is agiudantis sirianus hant pigau su cumandu de medas biginaus e sighint a gherrai”, at nau su diretori de s’Osservatoriu sirianu po is diritus de is ominis, Rami Abdel Rahman. Sa gherra at a sighiri finas a candu is curdus de s’Unidadi de protetzioni de su Populu (Ypg), chi sa Turchia narat siant terroristas candu cussus de su Pkk e de su Stadu Islamicu. “Arrendeosì”, si ligit in is volantinus chi bolant in sa citadi.

S’avantzada de is turcus non at frimau is bocidorgius de is civilis, antzis: in is dîs passadas is bombas nd’ant boddiu s’ispidali prus mannu de Afrin bocendu sonumancu degi tra ominis e feminas.

Mancat totu in Afrin, mancat s’abba e mancat sa cosa de papai, is fortzas de sa genti funt acanta de acabai.

 

Foto: leggo.it