In artu is tassas, imparis si bincit. Forsis mancat ancora calencuna cosa ma is binus sardus, chi funt in cust’editzioni de Vinitaly, podint festai. Vinitaly est s’atobiu prus famadu de totu su mundu po cussus chi faint binu, e cussa de cust’annu fut sa cincuantaduesima borta chi si fait. Norantaseti funt is aziendas sardas chi finas a mercuris ant abarrai in Verona a fairi testai, a cicai de fairi connosciri, e bendiri, binu. Totu paris po cicai de binciri is atrus in is mercaus de s’orrestu de su mundu, si cicat de fairi scuadra de calencunu annu a-i custa prti e parit ca sa cosa funtzionit in calidadi e in dinari puru. Setantaduas cantinas funt in su Padiglione 8 pigau in afitu de sa Regioni, e atras 25 tenint stand po contu insoru.
S’assessori regionali a s’Agricoltura, Pieruluisu Caria at nau ca: “Ancora una borta su Vinitaly est un’ocasioni po nosu de fairi connosciri is binus nostus a su mundu. Teneus numurus chi nos si narant ca is binus nostus funt crescendu in su mercau de is Stadus Unidus, in cussu de s’Asia e in s’America de su Sud. Non bastat un annu po fairi custu, est unu trabagliu chi erribat de atesu”.
Foto: lestradedelvino.com
