Dominigu passau s’est votau in Valle d’Aosta po is eletzionis regionalis. A binciri funt stetius is grogus de su Movimentu Cincu Steddas e is birdis de sa Lega. Massimamenti cust’urtima, a pustis bint’annus, torrat in Consigliu cun seti consiglieris de is 35 chi funt in totu. Is seti de sa Lega funt is proprius chi tenit s’Union Valdôtaine chi perou cinc’annus fait ndi teniant tregi. Imoi in Valle d’Aosta timint de abarrai chena guvernu poita sa lei eletorali chi fait votai est unu sistema proportzionali e po custu si depit cicai un’acordiu tra partidus.
Po sa Lega si torrat a arrepitiri cussu chi est giai sussediu in is eletzionis politicas de su 4 de martzu passau, candu su partidu de Salvini at pigau, partendu de nudda, su 17%. Eriseru sa capolista Nigoleta Spelgatti, abogau de Aosta cun arreiginis bergamascas est cussa chi at pigau prus votus de totus, in palas feti a su meri mannu de s’UV chi perou cinc’annu fait iat pigau degimila votus e cust’annu non ce dd’at fata mancu a ndi pigai cuatrumila. Sa Spelgatti at fatu giai sciri ca non bolit fairi nudda cun s’UV e si castiat, comenti in Roma, a is Steddaus.
Foto: ilfattoquotidiano.it
