Acumpangiada finas de su presidenti de sa Regioni Franciscu Pigliaru, de su presidenti de s’Anci Emilianu Deiana e de su sindigu de Casteddu Massimu Zedda, sa delegatzioni de is aministradoris de Nugoro est stetia intendia de sa cumissioni de su Mibact chi depit decidiri cali at essi sa capitali de sa cultura de su 2020. Funt degi is citadis finalistas e tra custas agataus finas sa capitali de sa Barbagia. Su sindigu nuoresu Andria Soddu at nau ca s’est “intendiu comentu unu studenti indenanti a s’esami de maturidadi ma segurus de ce dda fairi”.
In tres cuartus de ora sa delegatzioni at arrespustu a totu is preguntas de sa comissioni: “Creus in custu progetu poita Nugoro tenit necessidadi e gana de s’oberri a su mundu e bolit essiri a su centru de is processus culturalis de s’Italia”, at narau su sindigu.
Su presidenti Pigliaru at chistionau de s’agiudu chi sa Regioni donat a Nugoro in custu progetu, e in campu culturali prus che a totu, arregodendu ca: “Nugoro tenit s’agiudu de sa Regioni finas cun is cincuanta miliionis de eurus chi at a tenni po su progetu Area Vasta, po cussu de su Polo museale, po is iscolas e po meda atrus”.
Sa decisioni de sa cumissioni de su Mibact po sa citadi capitali de sa cultura 2020 dda eus a connosciri su 16 de friargiu
