Chi seis cichendu domu e si ndi boleis andai a biviri in Toscana est giustu chi scipais ca funt bendendu sa domu aunia at biviu Mighelangilu Buonarroti, de su 1549 candu dd’aiat comporada de Simona Guicciardini, fiuida de Perduantoni de Giuannifranciscu de’ Nobili, omini de sa corti de is Medici. Sa domu s’agatat in is collinas de Castellina, in su Chianti, cussa terra de maias chi dividit Siena de Firenza e si podit comporai po pagus soddus: seti milionis e mesu de eurus!
Su meri dd’at aconciada e a fatu de totu po sarvai totu cussu chi ddu est de antigu po contai a sa genti de su benidori comenti biviat sa familia Buonarroti, meri de custa domu po, prus o mancu, tregent’annus finas a su 1867. Chini dd’at a comporai at a podiri biri is documentus originalis de custa domu storica e tra custas s’atu originali cun sa firma de s’artista fiorentinu. Un’agentzia americana, de Charleston in South Carolina, s’est pigada s’impignu de dd’amostai a chini dda bolit comporai.
Est manna po tregimila metrus cuadraus e tenit otu aposentus po dromiri e seti bagnus. Candu dda iat comperada Mighelangilu contaiat giai setantacuatr’annus e fut acanta de incumentzai is trabaglius a sa Basilica de Santu Perdu.
Foto: immo-neo.com
