Unu progetu mannu po chini bolit girai sa Sardigna in bicicreta: duamila chilometrus de pista, e si nd’ant aciungiri atrus cincugentuscincuanta de fairi finas in trenu. Totu custu aintru de degi annus e cun centunorantadus milionis de eurus de spendiri, dinari chi podit torrai a palas cun su turismu e a su beni chi si fait a totu is logus aunia passat.
De totu custu, e de atru puru, s’est chistionau in s’atobiu cun is giorronalistas aprontau de sa Regioni. Ddue funt su presidenti Franciscu Pigliaru, s’assessori a is Trabaglius Pubricus Edoardo Balzarini, acumpangiauss de Italu Meloni de su Cirem e Chicco Porcu de s’Arst.
“Non c’at peruna cosa de festai – at nau Balzarini – ma boleus, a donnia manera, fairi sciri su trabagliu spantosu chi seus fendu po donai vida a-i custa cosa chi podit cambiai s’Isula e sa manera de dda biviri”.
Tenit arregioni s’assessori ma una cosa de festai, invecias, c’est giai: custu progetu at bintu su Premio Urbanistica 2018 chi est unu premiu de importu mannu.
Foto: padovaoggi.it
