Sa noti at consigliau Luisu Di Maio e Mateu Salvini chi in custas oras, de importu mannu po fairi nasciri su guvernu nou, sighint a fueddai po su programa e parit chi apant agatau su nomini po fairi su Presidenti. A mericeddu ant a bessiri de Mattarella cun anintru sa buciaca totu cussu chi serbit po fairi cuntentu su Presidenti de sa Repubblica e donai, prus a prestu, unu guvernu a sa natzioni.
De Mattarella ant a intrai non imparis ma una innanti e s’atra de sighiu, is Steddaus a is cuatru e mesu e is leghistas a is ses.
Non est ancora sparessia s’idea chi at essi Di Maio etotu a fairi su Presidenti, ma po custu iat a serbiri chi Salvini nerit ca giai. Po imoi si podit feti nai ca, comenti at nau su deputau Nigola Molteni de sa Lega, Di Maio e Salvini “ant fairi feti unu nomini a Mattarella”. Is nominis chi si fait funt medas, in area leghista si fait cussu de s’economista de setantun’annus Giuliu Sapelli chi, sigiu de calencunu giorronalista non at bofiu fueddai, finas chi at nau ca ddi pragit su programa chi ant fatu Steddaus e leghistas.
Foto: repubblica.it
