“Chi Strasburgo mi torrat a donai sa possibilidadi de mi candidai deu ia andai a Palazzo Chigi e Salvini, ca est unu grandu centravanti, iat a fairi su ministru de s’Internu”. Aici Sirviu Berlusconi torrat a chistionai de cussu chi podit sussediri pustis airi bintu is eletzionis de su cuatru de marzu. Ddu fait in sa dî chi a Palazzo Grazioli issu, Salvini e Giorgia Meloni firmant su programa eletorali de su centrudresta.

“Chi non ap’essi deu c’at essi unu presidenti capassu de ponni pagi”. Tenit giai unu nomini in conca ma ancora non ddu scoviat. Torrendu poi a is alleaus: “In su 2008 m’ant traigiu, ma oi est cambiau totu: Salvini est omini chi pensat a su de fairi e sa Meloni est una meda sintzera”.

Abarrant, a donnia manera, is cuntrastus cun sa Lega po sa riforma de is pensionis de sa Fornero: “Est s’unica cosa de su programa chi nosi fait chistionai, Salvini dda iat bolli bogai de mesu, nosu ndi boleus bogai feti is cosas chi no andant”. In beridadi ddu at atras cosas chi ddus dividint comenti is vacinus, s’euro e sa Ue, ma Berlusconi est maistu in su nai feti cussu chi is atrus bolint intendiri.