Depiant essiri tregentucorantases is eia po sa fiducia a su guvernu de is Steddaus e is leghistas, invecias nd’at pigau cuatru in prus eriseru in sa Camera de is deputaus. duxentutrintases funt cussus chi ant nau ca nou e trintacincu né s’unu né s’atru. Est sa segunda borta, apustis cussa in su Senau, chi Conte pigat sa fiducia e imoi podt incumentzai a trabagliai. Po Peppi Conte eriseru e dinnanti, in Palatzu Madama e in Montecitorio, unu batiari de fogu. In sa Camera at cicau de arrespundiri a totu is criticas: “eus a trabagliai inderetura po passai de cussu chi eus scritu a cussu chi eus a fairi”.
Candu at fueddau de is interessus chi totus podint tenni in su guvernu totus ant incumentzau a morrungiai. “Dognunu tenit unu interessu piticu de portai ainnanti”, at nau su Presidenti, e inderetura is bogis si funt fatas prus artas. Renzi at arregodau ca su ministru de sa Difesa, Elisabetta Trenta, teniat una sociedadi po cicai militaris po andai aunia est sa guerra. De sa parti de Fortza Italia, invecias, ant incumentzau a aboginai “Casaleggio, Casaleggio”, po ddis arregodai ca cussu puru teniat interessu mannus.
Foto: tg24.sky.it/
