Su Milan po unu tempus sunfrit su Casteddu, apusti airi paregiau cun Higuain erriscat finas de binciri ma est tropu adduru e si depit acuntentai de unu paregiu chi parit unu brinchidu a palas cunfrontau a sa vitoria contras de sa Roma de duas cidas fait. Unu a unu est acabada sa partida: Joao Pedro fait a timiri su tiaulu torrendu a pigai una bocia de Pavoletti chi nd’iat boddiu su palu cun d’unu bellu tiru de una parti a un’atra.
Unu palu de Barella de atesu podiat donai un’atru pagu de vantagiu a su Casteddu, invecias su Milan si nd’est scidau e in su segundu tempus at cicau de binciri sa partida chena fairi perou meda. S’alleandori de is sardus a sa fini de sa partida at nau custus fueddus po fairi cumprendiri comenti est andada sa partida: “Seus partius a forti meda e podiaus fairi un’atru gol puru, ma, pensu, chi su Milan apat meressau su paregiu. Barella et crescendu meda e fait prageri a ddu biri gioghendu, at a diventai unu campioni mannu”. Sabudu chi benit su Casteddu si dd’at a biri cun su Parma de D’Aversa chi at bintu cun s’Inter sabudu passau, atra partida tostada ma de non timiri po nudda, s’aria est cambiada pensendu a s’annu passau.
Foto: calciomercato.com
