Unu puntu de oru cussu chi at fatu su Casteddu in su campu de sa Fiorentina, dominigu a merì, erribau apustis una partida giogada cun gana e cun tecnica puru. “Portaus a domu unu paregiu meritau e chi nos fait beni po su benidori. Soi cuntentu po su caratiri fatu biri de sa scuadra. Su gol de Pavoletti est erribau in s’ora giusta, at fatu unu movimentu de cussus chi feti is grandus cannonieris scint fairi”, at nau, fendusì biri cuntentu, s’allenadori Maran.
Is sardus ant depiu sighiri sa scuadra de Pioli candu su francesu Veretout at postu in rete su rigori donau de s’arbitru po un’intrada perigulosa de Barella e dd’ant fatu cun sa conca e cun generosidadi manna, chena si fuliai indenanti po donai modu a sa Fiorentina de ddus frigai.
Dominigu a is tres erribat a sa Sardegna Arena sa scuadra becia de Rolando Maran, allenada imoi de Ventura. Su Chievo tenit bisongiu de puntus po incumentzai a bessiri in classifica ma is piciocus de Maran, imoi chi ant agatau sa cuadra, non tenint peruna intentzioni de si fairi binciri.
Foto: fantamagazine.com
