Apusti airi chistionau cun su presidenti Sirviu Berlusconi de cussu chi est sussedendu in Sardigna, Ugo Cappellacci nd’at arretirau is dimissionis, chi iat donau in su mesi de orgiolas, de organizadori de Fortza Italia in Sardigna etotu.

Dd’at fatu sciri Cappellacci eriseru a merì scriendu una nota aunia si podit ligiri: “Apu fatu sciri a su Presidenti nostu cali est sa situatzioni innoi in Sardigna, e apusti ddu airi discutiu unu pagu de cosas importantis medas comenti is eletzionis de friargiu, apu decidiu dde n’arretirai is dimissionis chi ia donau in orgiolas. Cun custu bogliu fairi is cosas beni po su partidu e agiudai su cambiamentu cun ideas noas e genti chi benit de totu sa terra nosta. Depeus fairi sa scuadra meglius chi siat e imparis a is alleaus nostus agiudai sa Sardigna a si ndi pigai su benidori po is generatzionis noas”.

Su catodigi de cabidanni is consiglieris regionalis de Fortza Italia, Alissandra Zedda, Oscar Cherchi, Stevini Coinu, Pepi Fasolino, Antoneddu Peru, Albertu Randazzo, Marcu Tedde, Edoardu Tocco e Stevini Tunis iant fatu sciri ca funt preocupaus meda poita mancada in Sardigna unu chi facat sa parti de s’organizadori. Po custu su presidenti Berlusconi at decidiu de non acetai is dimissionis de Cappellacci.

 

 

 

Foto: sardegnadigitallibrary.it