Incumentzat su tempus de su mari e incumentzant a ndi furai s’arena de is spiagias is primus turistas. In su fini de cida passau in s’aereoportu de Su Masu is militaris ant frimau, prus o mancu, centu turistas cun in is valigias butiglieddas prenas de arena. Ant agatau arena de sa spiagia de Is Arutas e finas cussa de Chia e de sa Crabonaxa.
Giai de una pariga de cidas si connosciat su problema ma est in s’urtimu fini de cida, gratzias a su primu calori de s’annu, chi is militaris ant trabagliau de prus po cassai is furonis e arena.
Funt, massimamenti, is turistas tedescus e olandesus cussus chi nde dda furant in custu tempus, ma in s’istadi non parit chi siat unu problema de natzionalidadi: ddu faint unu pagu totus, strangius e italianus. Ndi leant s’arena sempiri a sa matessi manera, aintru de scatuleddas, butiglieddas o bustas de prastica e atacant totu aintru de is valigias.
De arregodai ca chini ndi leat s’arena si podit pigai una multa de tremilla eurus, e finas chi si narat e si torrat a nai ca non si ndi podit leai s’arena parit ca a-i cuss’origa is turistas no nd’intendant. In si uficius de Su Masu ddue funt seti scatulas prenas de s’arena secuestrada, non parit beru!
Foto: galluraoggi.it
