A si morri a trintun’annus non est una cosa giusta po nemus. Cancu a ddu fairi est unu piciocu chi totu connoscint, comenti Davide Astori, parit ancora prus pagu giustu.

Si nd’est andau in-d’unu aposentu de unu albergu de Udine aunia depiat giogai a is tres sa partida Udinese-Fiorentina, si nd’est andau, comenti at biviu, chena aboginai e chena fairi intendiri de nemus. Ancora non si scit eita est sucediu, tocat aspetai is arresultaus de is dotoris ma sa lastima prus mannu est ca una pipia, Vittoria de dus annus, at a cresciri chena unu babbu. Is fueddus meda bortas non serbint a nudda, ma una nova che-i custa fait torrai in sa terra su mundu de su palloni chi a totus parit feti prenu de prendas. Un’omini, unu pobiddu, unu figliu, unu babbu, unu sportivu, est custu chi si perdit e pagu si podit fairi chi non arregodai e torrai arregodai cussu chi at semenau.

Astori at tentu eita biri meda cun sa terra nostra, po ses annus (de su2008 asu 2014) at biviu in Casteddu gioghendu in sa scuadra sarda. Centusetantatres bortas est calau in campu cun sa maglia orrubiuasula e po tres bortas at fatu finas gol. De arregodai puru ca cun sa maglia de su Casteddu est erribau in sa Natzionali italiana, fendu unu gol cun s’Uruguay, portendu su nomini de unu giogadori de su Casteddu un’atra borta a dd’assentai in cussus chi faint gol a pustis corant’annus de Gigi Riva.

A biri totu is cosas chi ant nau e scritu, at lassau de seguru arregodus bellus de unu piciocu puliu e seriu.

 

 

Foto: curiosando708090.altervista.org