S’Unioni Europea at scrocorigau sa Lei de Bilanciu de su Guvernu Conte e at pediu, chi aintru tres cidas (scadentzia su 13 de Sant’Andria) un’atru documentu chi s’Italia depit mandai. Is comissarius, chi si funt atobiaus eriseru in Strasburgo, non c’ant calau cussu numuru de su deficit-Pil a su 2,4%.
Non fut mai sussediu finas a imoi una cosa aici e cussu chi podit sussediri in su benidori non si fait dromiri beni. Si chistionat de una multa de noi miliardus po non airi tentu in contu is arregulas europeas.
Moscovici e Dombrovskis, dus de is comissarius, in-d’una cunferentzia cun is giorronalistas, ant fatu sciri comenti funt andadas is cosas. “Po sa prima borta eus pregoantau a unu Stadu de s’eurozona de torrai a biri su Dpb. Mi dispragit non ddue fut perun’atra solutzioni poita is arrespustas chi nos ant donau non serbiant a nudda”, at nau Dombrovskis, aciungendu puru ca su guvernu italianu est andendu contras is impignus giai pigaus in passau.
Foto: google.it
