Fortza Italia, su partidu de Berlusconi, dd’acabat de giogai e narat craru-craru, in tres intervistas cun is giorronalis sardus, ca sa candidadura de Christian Solinas comenti de guvernadori, po is Regionalis de friargiu 2019, non est chi ddis andit meda beni. Cussu chi tenint de nai ddu narant cun is fueddus de sa politiga e is fueddus assimbigliant meda a: “Solinas nos andat beni, ma…”. Sa cuntierra est seria deaveras.

Is tres intervistas, bessias in S’Unioni Sarda e in sa Nuova Sardegna, funt de su deputau asulu Perdu Pittalis, s’euruparlamentari Sarbadori Cicu e sa consigliera regionali Alisandra Zedda. De seguru non funt is urtimus erribaus. Is tres funt cussus chi funt fendu finas una “guerra” a su coordinadori de su partidu Ugo Cappellacci e chi iant scritu una litara a Berlusconi in su mesi de Santu Gaine passau nendu ca Fortza Italia, aici comenti fut, non andat beni po nudda.

 

 

Foto: wikipedia.org