Eriseru, in sa giorronada aintru de mesu de cida de su campionau Natzionali de is Diletantis, sa scuadra sassaresa, bessia s’annu passau de s’Eccellenza, at perdiu po dus a unu in su campu de s’Ostia Mare e po mesu de custu su presidenti Sarbadori Sechi nc’at bogau s’allenadori. Est andendu mali sa Torres e cussu de su presidenti podit essiri sa sola cosa de fairi po cicai de donai unu corpu a totu s’ambienti.

“Oi puru, aici comenti in atras partidas ,eus bistu una Torres a duas facis – at nau su presidenti Sechi – cun meda timoria in su primu tempus e cun gana e barra in su segundu candu, a dogna manera, sa partida fut giai perdia. Apu bidu ca si podit contai in medas giogadoris po su tempus benidori ma tocat a cambiai calencuna cosa poita non si podit sighir a perdiri partidas comenti in is urtimus tempus”.

In is oras chi erribant, fait sciri sa sociedadi sassaresa, s’at a fairi sciri su nomini de s’allenadori nou e in s’ora su presidenti Sechi torrat gratzias mannas a Pino Tortora chi s’annu passau, tocat a si dd’arregodai, at fatu unu trabagliu mannu aberu.

 

 

Foto: wikipedia.org