Cuatrugentus presoneris si funt fuius de su presoni in is orus de Tripoli. Nd’ant aprofitau ca in sa Capitali est totu unu burdellu, ant fatu fortza po oberri is portas e ce dd’ant fata a si fuiri de Ain zara: meda de custus funt “tifosus” de Gheddafi e s’agataiant in presoni poita cundennaus po is cosas legias chi iant fatu in su2011 insegus de sa rivolutzioni. Tripoli est in custa situatzioni de candu ant bociu a Gheddafi e cenarba passada sonumancu cuindigi ratzus funt propius in sa citadi, una pariga finas in s’aereportu de Mitiga, chi est su solu chi ancora funtzionat. In s’urtima cida, apustis de sa cuntierra de is militzias cumentzada in su sud de sa capitali, funt mortus in corantaseti e prus de centu funt is ferius.
Arriolau totu su mundu. S’Onu – chi martis s’agatat po chistionai de custu – cundennat totu cussu chi est sucedendu. De su ministeru italianu de sa Difesa faint sciri ca is militaris chi s’agatant in Libia non currint perunu perigulu.
Foto: tpi.it
