Funt sessantotu milionis cussus chi in su 2017 si funt fuius de is domus proprias po mori de guerras, violenza, poberesa, maladias e carestias, po si nd’andai in atrus logus. Is numurus ddus at fatus sciri s’Unhcr, chi est unu brassu de s’Onu, chi nos si narat puru ca funt crescius de cuasi su cincu po centu cunfrontas a s’annu passau.

Sa genti chi si fuit si nd’andat massimamenti in Turchia, Pakistan, Uganda, Libano e Iran, sighius totus de sa Germania. Su setanta po centu de sa genti chi si fuit ndi benint de cincu natzionis: Siria, Afghanistan, Sud Sudan, Myanmar e Somalia.

Si ligit in is paginas de S’Unhcr: “Curpa manna de totu custu funt sa crisi de su Congo, sa guerra in Sud Sudan e is rifugiaus rohingya, chi erribant de su Myanmar, chi si fuint in Bangladesh”.

In custus sessantotu milionis funt contaus puru is binticuatru milionis chi si fuint po mori de sa guerra, custus funt cuasi tres milionis in prus de cussus de su 2016.

 

 

 

Foto: oltrelalinea.news