Non at mai perdiu in su 2018 e no ddu podiat fairi eriseru in sa finali, sa dde duas, de is playoff natzionalis. In su campu de Bastia Umbra sa scuadra de sa Torres at fatu po binti bortas de sighiu unu arresurtau bonu: cuatru gol po parti, apustis su primu tempus fut acabau 2-1 po su Cannara. Sa prima finali fut acabada 1-0 po sa scuadra sarda.

Is sassaresus ant sighiu sa partida aunia currint is cuaddus, e sa festa est incumentzada inderetura una borta acabada sa partida.

Is piciocus de Pino Tortora, s’allenadori de sa Torres, ant fatu biri de non si donai mai po bintus e ant giogau cun barra manna. Apustis cincu minutus de s’incumentzu de sa partida funt giai perdendu ma ce dd’ant fata a paregiai cun su difensori Minutolo e in segus ant torrau a pigai unu gol innanti de sa fini de su primu tempus. in digiotu minutus de su segundu tempus sa Torres at fatu dus gol cun Sarritzu e Spinola, duncas su Cannara at paregiau cun Anselmi a degi minutus de sa fini. Andaiat beni de aici puru ma po meglius seguranza sa Torres at torrau a segnai a su norantesimu. Feti a pagu segundus de sa fini su Cannara at torrau a paregiai, ma non c’iat prus tempus e sa festa podiat cumentzai po is orrubiuasulus.

Foto: it.wikipedia.org